Erfitt takmark, en ég skal ná því!

Mitt takmark á nýju ári er að verða betri maður. Það hefði verið mun betra fyrir mig og léttara að heita því að grennast og léttast um einhver ósköp af kílógrömmum, því af nógu er að taka. Það hefði líka verið auðveldara fyrir mig að strengja þess heit að hvorki skuli ég reykja né drekka á komandi ári því hvorttveggja hef ég lagt af fyrir löngu síðan og því auðvelt að standa við það.

Ég bið lesendur þessara orða að festa sér í minni að ég set mér það sem markmið að verða betri maður. 

Það er ekki lítið verkefni og að því er virðist lítt árennilegt fyrir mann á mínum aldri, en ég er ákveðinn og ætla að standa við fyrrirheitið.

Auðvitað sjá allir sem mig þekkja að erfitt er að bæta það sem svo nálægt fullkomnun er, en ég er staðfastur og ekki vanur að ráðast á garðinn sem hann er lægstur.

Fæ ég hvatningu frá lesendum? 

Ráðleggur hvernig efna megi nýársheitin

Athugasemdir

[Villi Asgeirsson, 31.12.2007 kl. 10:47]

Ég sé ekkert 12 þrepa plan. Þar sem þú ert karlmaður er það málið. Gerðu athugasemd hér fyrir neðan þar sem þú segir okkur hvernig þú munt bæta þig, í smáatriðum. Nema þú viljir bara bæta kvenlegu hliðina, þá er þetta fín aðferð.

Gleðilegt ár! 

[Heimir Lárusson Fjeldsted, 31.12.2007 kl. 11:10]

Nú vandast málið Villi.

Ég hélt að konur útvörpuðu áformum sínum í smáatriðum, en við KARLmenn geymdum slíkt innra með okkur og létum fáa eða enga vita um áform okkar í hnotskurn.

Gleðilegt ár og árangursríkt í hverju einu sem þú tekur þér fyrir hendur.

[Greta Björg Úlfsdóttir, 31.12.2007 kl. 11:31]

Lengi getur gott batnað, er ekki sagt svo?

Gangi þér vel og eigðu gleðilegt nýtt ár!