Innheimtulögfræðingar borgarinnar staðfastir í þvermóðsku sinni

Á hverju ári í ein sjö ár hef ég fengið rukkun frá mismunandi innheimtulögfræðingum sem vinna fyrir Reykjavíkurborg. Alltaf er erindið það sama, að innheimta hundsleyfisgjald (þó að lögmennirnir tali alltaf um hundinn minn sáluga í fleirtölu sbr.: "Kröfueigandi: Reykjavíkurborg v/hundaleyfa.")

Á hverju ári svara ég viðkomandi innheimtulögfræðingi á sama veg, þ.e. að hundurinn sem einu sinni var, sé ekki lengur á mínum snærum og gott ef ekki að ég hafi látið fylgja að enginn mannlegur máttur komist í samband við hann framar.

Allt kemur fyrir ekki, innheimtulögfræðingar Reykjavíkurborgar halda áfram að lemja hausnum við stein og senda innheimtubréf, áminningar og gott ef ekki  stundum hótanir.

Undir nýjasta bréfið ritar nafna borgarstjóra, sem er nýmæli að mig minnir. 

Mér er þetta að vísu að meinalausu því ég fæ ekki svo mörg bréf  inn um lúguna lengur. 

Athugasemdir

[Ragnheiður , 6.10.2008 kl. 14:37]

Ha?

Þarf maður að framvísa dánarvottorði voffa ef hann burtkallast ?

Það er þá eins gott að hafa það á hreinu

[Heimir Lárusson Fjeldsted, 6.10.2008 kl. 14:41]

Mér hefur ekki tekist að sannfæra reykjavíkurborg ennþá.

Kannski hölduym við bréfaskiptum áfram næstu árin.

Ég hef lítið annað að gera þessi misserin.

[Ragnheiður , 6.10.2008 kl. 14:50]

Já það er ágætt að eiga góða pennavini, eins og í gamla daga

[Axel Jóhann Hallgrímsson, 6.10.2008 kl. 15:58]

Hefurðu beðið Vilhjálm Þórmund ásjár? Hann er þarna enn eða hvað?

Það berast engar fréttir af borgarmálum í því gjörningaveðri sem nú gengur yfir.  Er þessi efnahagskrísa kannski smjörklípa borgarstjórnar?

[Heimir Lárusson Fjeldsted, 6.10.2008 kl. 16:16]

V. Þórmundur hefur ekki verið settur inn í málið. Hann hefur öðrum hnöppum að hneppa ;-)

Allt smjörklíputal verður að falla niður að sinni núna eftir ræðu forsætisráðherra.