Að láta teyma sig á löngum eyrum

Torskilin grein birtist í Morgunblaðinu í gær eftir Ögmund Jónasson og Garðar Hilmarsson.Umræðuefnið er sátt Starfsmannafélags Reykjavíkurborgar við Strætó bs. sem gerð var í síðustu viku um málefni starfsmanns sem var áminntur og síðar sagt upp störfum. Sú saga öll er sorgleg og verður ekki rifjuð upp hér.

Í síðustu viku svaraði Reynir Jónsson framkvæmdastjóri Strætó bs. aðspurður af blaðamanni Morgunblaðsins að sátt hafi náðst í deiluefnum aðila, en áminning og uppsögn stæðu.

Í grein sinni í gær segja þeir Garðar og Ögmundur hinsvegar að áminning og uppsögn standist ekki og vitnað um leið til orða sem ekki eru í þeirra eigin grein þegar þeir segja: " Þetta er ekki rétt eins og hér hefur verið rakið."

Það var ekki stafur um þetta í stuttri grein þeirra, en verið getur að hluti greinarinnar hafi fallið út í vinnslu blaðsins þótt ég leyfi mér að efast um það.

Forysta Starfsmannafélags Reykjavíkurborgar verður að skoða mál frá fleiri hliðum áður en þeir láta teyma sig lengra á löngum eyrum. 

Ég hef heyrt í nokkrum starfsmönnum fyrirtækisins og enginn þeirra skilur greinina, eða þær hvatir sem að skrifunum liggja.

Fyrir u.þ.b. tíu árum kom upp svipað "trúnaðarmannsmál" hjá álverinu í Straumsvík. Því lauk á álíka hátt og síðan hefur ríkt friður hjá starfsmönnum eftir því sem starfsmenn þar hafa sagt mér.