Þegar leiðir frá Reykjavík lokast.

Farið með flugrútunni kostar 1300 krónur aðra leiðina REK - KEF.

Fyrir fjögurra manna fjölskyldu kostar því 10.400 krónur fram og til baka er farið er til útlanda.

Hefur Dagur B. Eggertsson sem leggur til að koma á lestarsamgöngum á milli sömu staða kannað hversu margir nota flugrútuna fyrir utan útlendingana sem ekki eru á bílaleigubílum?

Er ekki nauðsynlegt að kanna fjárhagslegan grundvöll lestasamgangna  áður en umræðan fer út um víðan völl?

Reykvíkingar hafa nægt land til að byggja næstu árhundruðin svo ekki þarf á þessu landi að halda í bráð.

Ég hefði haldið að það væri varhugavert að fjölga nær ótakmarkað fólki á nesinu sem Reykjavík er á, vitandi að landið tekur miklum breytingum með eldgosum í aldanna rás.

Þarf ekki að huga að undankomuleiðum þegar fer að gjósa í nágrenni Reykjavíkur?

Þá lokast leiðir að Hólmsheiði. 

Gæti ekki orðið þörf fyrir bæði sjó- og loftflutninga á fólki þegar fáar undankomuleiðir spillast vegna hrauns og eða ösku?

Liggja ekki áætlanir, vel varðveittar, um næstu höfuðborg norðan Hvalfjarðar, í Leirársveit?

Sýnir það svo ekki verður um villst, að við þurfum á loft- og lagarflutningum að halda þegar til kemur.

Athugasemdir

[Árni Gunnarsson, 25.2.2008 kl. 14:56]

Sæll frændi, margt athyglisvert í þessum pistli þínum. Sjálfur hallast ég nú að því að lestarsamgöngur til Keflavíkur sé, í það minnsta kostur sem vert er að gaumgæfa. Og áður en lengra er haldið minni ég á að það getur ekki verið að praktísk skynsemi sé bundin við stjórnmálaflokka í öllum tilfellum.

Þetta mál þarf að skoða frá öllum hliðum eins og flugvallarmálið og í tengslum við það. Ef núverandi flugvallarstæði er eins mikilvægt fyrir borgina til bygginga eins og margir fullyrða, þá yrðu niðurgreidd fargjöld til Keflavíkur áreiðanlega betri kostur en bygging nýs flugvallar. Auk þess á það að vera ljóst að rekstur eins flugvallar er ódýrari en tveggja.

Mér er reyndar ekki ljóst að við hóflausa notkun einkabílsins verði auðvelt að tryggja vandræðalausar samgönguleiðir við byggð á flugvallarsvæðinu.

Og innlegg þitt í öryggi Reykjavíkur, litið til þess að vera á eldvirku svæði er tímabært og mikil furða hversu pólitíkusar hafa verið andvaralausir þar í öllu efni. Í stuttu máli er hægt að segja að við hugsanlegt eldgos sé stærstur hluti þjóðarinnar í bráðri hættu. Ekki er mér kunnugt um að nokkur önnur þjóð búi við svo hrikalegt hættuástand eins og hér blasir við ef allt færi á versta veg í þessu efni. Og engir ættu betur að skynja þetta en við sjálf.

En eins og alltaf segjum við líklega: "Þetta reddast."

Óskaplega væri það metnaðarfullt viðfangsefni að skipuleggja nýja borg norðan Hvalfjarðar og stöðva frekari útþenslu gömlu Reykjavíkur!   

[Heimir Lárusson Fjeldsted, 25.2.2008 kl. 15:43]

Ég á bágt með að trúa því að stjórnvöld hafi ekki sýnt þá fyrirhyggju að undirbúa nýja borg norðan Hvalfjarðar það sem eldvirkni er engin.

Ef ekki, þá er það tímabært.

[Axel Jóhann Hallgrímsson, 25.2.2008 kl. 16:01]

Hvar ætlarðu að láta gjósa í nágrenni R.vík, Heimir? Gott að vita það svo maður viti hvert á að hlaupa.

[Heimir Lárusson Fjeldsted, 25.2.2008 kl. 16:05]

Ég held Axel að þú bjargir þér skammt á hlaupum. Skoðaðu hraun í nágrenni Reykjavíkur og hlauptu svo.

[Axel Jóhann Hallgrímsson, 25.2.2008 kl. 16:14]

Tók það ekki einhvern tíma fyrir hraunin að renna? Urðu þau til ei einni sviphendingu? Ja ég bara spyr?

[Heimir Lárusson Fjeldsted, 25.2.2008 kl. 16:18]

Ég læt öðrum eftir að stunda svona þrætubókartakta.

[Axel Jóhann Hallgrímsson, 25.2.2008 kl. 16:43]

En þú stokkaðir spilin.