Hr. Staksteinar

30.11.2010 | 10:39

"Núverandi ríkisstjórnarflokkar hófu sín fyrstu skref á hatursherferð gegn andstæðingum sínum og jafnvel ímynduðum óvinum. Markmiðið var augljóst. Það skyldi tryggja að ábyrgðinni af bankahruninu yrði klínt svo kirfilega á þá, að henni yrði aldrei þaðan náð, hvað svo sem sannleikanum og staðreyndunum sýndist. Þess vegna mátti ekki bíða eftir að Rannsóknarnefnd Alþingis lyki sínum störfum. Ófrægingarherferð ríkisstjórnarflokkanna og aðgerðir sem á henni byggðust hófust á fyrsta degi, og er þá talað í bókstaflegri merkingu. Nokkur árangur náðist, en sannleikurinn er seigari en rógberarnir héldu. Hann fer sér hægt en hann kemst furðu langt að lokum.

Eftir því sem ógöngur ríkisstjórnarinnar hafa aukist hefur verið reynt að dreifa athyglinni frá getuleysi hennar og skaðsemi. „Þjóðfundur“ var haldinn á einum dagsparti og kostaði hundrað milljónir. Nú vita menn að þar fór ekki fram neinn fundur, heldur spjall á hundrað tíu manna fundum sem „umsjónarmenn“ komu síðan í fyrirfram ákveðnar niðurstöður. Afskræming lýðræðis.

Næst var reynt að sannfæra menn um að Stjórnarskráin hefði gert eitthvað af sér en ekki þeir sem rændu bankana innan frá. Kjósa skyldi stjórnlagaþing. Sagt var að einfalt væri að kjósa ef kjósandinn lærði heima. En fullyrða má að örfáir vissu í raun hvernig atkvæðagreiðslukerfið virkaði. Kannski bara tveir og þeir fóru báðir í framboð. Þetta varð flopp og hundruð milljóna til viðbótar í súginn.

Ruglinu verður þó haldið áfram með enn meiri eyðslu."

STAKSTEINAR