Verslun á villigötum?

" Það er full þörf á að taka tillit til kaupenda sem komnir eru yfir sextugt. Annað væri bara heimska fyrir fyrirtæki sem eru í verslun og þjónustu" segir  Sigurður Jónsson framkvæmdastjóri Samtaka verslunar og þjónustu.

Ofangreind tilvitnun er úr viðtali Þóru Kristínar Þórsdóttur í 24 stundum í dag við Sigurð Jónsson.

Hvers vegna þarf  framkvæmdastjórinn að taka þetta fram?

Ég er ekki nema sextíu og tveggja ára og finn engan mun á mér og þegar ég var þrjátíu og tveggja, fjörutíu og tveggja eða fimmtíu og tveggja.

 

Ég þarf sömu þjónustu í dag og þegar ég var þrjátíu og tveggja.

Varðandi verslun og þjónustu hefur engin breyting orðið á kröfum mínum eða þörfum.

 

Það má að vísu færa verslunina aftur heim í hverfin, því ögn lægra vöruverð í fáum stórum verslunum færir mér ekkert nema aukinn ferðakostnað; ekki betri þjónustu nema síður sé og alls ekki ódýrari vöru þegar tillit er tekið til aðdráttakostnaðarins.

Ég fæ mikið verri þjónustu og mæti oft á tíðum ókurteisi í verslunum í dag.

Stórar verslanakeðjur þurfa að kenna unga fólkinu sem er við störf á kössunum almenna kurteisi og að þekkja muninn á afriti og kvittun svo lítið dæmi sé nefnt.

 

Unga fólkið er allt af vilja gert en vantar fræðslu.