Klámfengnar samræður útlendinga á kaffihúsi.

23.2.2007 | 12:22

Klámfengnar samræður útlendinga á kaffihúsi.

Ég fór á kaffihús um daginn eins og svo margir gera hér á landi. Líklega verður þetta í síðasta sinn sem ég sæki þetta kaffihús því á næst næsta borði við mig, vinstra megin sátu fimm útlendingar við kaffi og koníaksdrykkju og ég get svarið það að þeir voru að klæmast.
Að vísu heyrði ég ekki vel orðaskil en heyrði þó orðið "porno" offt bera á góma hjá þeim og var enginn þessara klámfengnu útlendinga undanskilinn.

Hvað eftir annað gekk þjónustustúlkan framhjá borðinu og það gat ekki farið framhjá henni hvað þarna var á ferð, en hún aðhafðist ekkert. Ekki nokkurn skapaðan hlut.

Nú vil ég fara þess á leit við ríkisstjórn og borgarstjórn að svo fljótt sem auðið er verði skipuð sveit eftirlitsmanna sem fari dulbúin á okkar helstu kaffihús og veitingastaði svo ekki sé talað um hótel með upptökutæki og ekki síst heimild til að handtaka hvern þann útlending sem dirfist að tala svo ógætilega hér á landi að til kláms geti talist.
Viðkomandi yrði þegar í stað hnepptur í gæsluvarðhald án dómsúrskurðar (nægjanlegt að leita álits og samþykkis Femínistafélagsins) þar til honum yrði vísað úr landi og fengi aldrei aftur leyfi til að koma hingað aftur.

Ég hef mun feiri tillögur gegn svona svívirðingu handbærar og geri ráð fyrir að mér verði falin yfirumsjón með klámpólitíinu.
Virðingarfyllst.

Flokkur: Stjórnmál og samfélag | Facebook

Athugasemdir

Þetta var mjög á móti minni siðferðisvitund að rita þetta fjögurra stafa dónalega orð. Nú er líklega loku fyrir það skotið að ég fái stöðuna við skipulag eftirlitsins.

Klámfangelsið bíður mín.......

Sjáumst Hallur.

Heimir Lárusson Fjeldsted, 23.2.2007 kl. 12:36

Þið eruð hér með "Pornodogs" Og ykkar bíður ekkert annað en klámfangelsið.... Er það annars ekki þetta sama sem Falun Gong meðlimir voru settir í. Um að gera að nýta húsnæðið.

Ásthildur Cesil Þórðardóttir, 23.2.2007 kl. 12:44

Þetta minnir ögn á nútímaþjóðsöguna um konuna sem lagði fram kæru vegna karlkyns nágranna síns sem lét hjá líða að draga gluggatjöldin fyrir áður en hann tók af sér garmana. Þegar verðir laganna komu til hennar að kanna hvað hæft gæti verið í þessu. Kom þá ljós (við nánari rannsókn) að konan gat enganveginn séð þennan glugga - ja nema ef vera skyldi að hún stæði upp á allþykkum bunka af klámblöðum sem var innan seilingar. Sumar þjóðsögur eru sannar! - kannski einnig þessi? Fussumsvei!