Mannauður hjá Strætó bs.

Ég tók strætó fyrir hádegið í dag upp í Grafarvog nánar tiltekið í Rima apótek (ódýrast). Vagninn (leið 6) stansar fyrir utan dyrnar og er á fimmtán mínútna fresti. Afgreiðslan í Rima apóteki er alltaf örugg og fumlaus og ég þurfti að hinkra ögn eftir sexunni á bakaleiðinni. Gísli Þórðarson vagnstjóri var öryggið uppmálað og ég tók eftir því að hann gætti þess á öllum biðstöðvum að vera á réttum tíma. Oftar en ekki þurfti hann að doka aðeins við svo hann færi ekki á undan áætlun. Á rauða dreglinum við gatnamót Miklubrautar og Grensásvegar barst töluverður hávaði inn í vagninn. Gísli stöðvaði samstundis og fór út að gæta að hvað hávaðanum ylli. Reyndist þá fólksbíl hafa verið ekið inn í hlið vagnsins fyrir aftan afturhjól.Hvort konan sem ók fólksbifreiðinni hefur verið að mála sig eða í símanum eða ég veit ekki hvað, hún sá ekki stóran gulan strætisvagninn og ók bara á hann. Stuðarinn af hennar bíl og allt framstykki fór af í heilu lagi. Konan kom hlaupandi til Gísla vagnstjóra og sagði honum bara að halda áfram og halda sinni áætlun. Gísli var sallarólegur og hafði samband við stjórnstöð Strætó og greindi frá málavöxtum og óskaði eftir skýrslutöku lögreglu. Skaðinn væri að vísu ekki mikill á vagninum en hann taldi það rétt. Að athuguðu máli sá ég að Gísli Þórðarson vagnstjóri hafði rétt fyrir sér því á skráningarnúmeri fólksbifreiðarinnar kom í ljós að hún hafði ekki verið færð til lögbundinnar skoðunar síðan 2006 og því ekki að vita hvort hún væri tryggð heldur. Hárrétt hjá Gísla. Eftir fimmtán mínútur kom svo næsta sexa auðvitað á áætlun líka og ekki var lakari vagnstjóri þar á ferð. Gunnar Sigurjónsson opnaði allar dyr síns vagns og hleypti öllum farþegunum úr vagni Gísla inn og hélt svo sinni ferð áfram. Þarna voru að verki tveir frábærir starfsmenn Strætó bs. og voru ekki að fjasa um hlutina. Ég hygg að svona, nákvæmlega svona eigi vagnstjórar að bregðast við vanda sem mætir þeim í daglegum störfum sínum.

Færri á götum borgarinnar