Í kaffi hjá Önnu og Ragnheiði

Hún Ragnheiður sem ég hitti í Kjötborg í gær bauð mér í kaffi til sín og móður sinnar. Ekki lét ég segja mér það tvisvar og þáði boðið með þökkum. Síðdegis skellti ég mér.

Þær eru góðar heim að sækja mæðgurnar á Sólvallagötunni og er alltaf gaman að sitja á eldhúsbekknum og skrafa um heima og geima hvoru megin sem þeir eru. Ragnheiður fór á kostum enda hætt að reykja sem klæðir hana vel eins og alla aðra sem láta af þeim ósið.

Í morgun sá ég kaffiboðið í þessu ljósi:

Að örlæti miklu skenkti mér Anna

allgóðu kaffi svo keik.

Rétti mér hnífinn bað kökuna kanna

ég karlanginn átti þá leik.