Starfsmanni Strætó svarað.

Ég sé Vésteinn Valgarðsson að þú ert sannleiksleitandi og vilt hafa það sem sannara reynist hverju sinni og er það vel.

Það er vitað mál að við búum ekki í landinu án laga og við skipum ekki félagslegum málum okkar án laga.

Allir fullgildir aðilar í Starfsmannafélagi Reykjavíkurborgar eiga heimtingu á því að formaður og stjórn félagsins fari að lögum félagsins eins og þau eru hverju sinni, en það hafa þau ekki gert í þessu máli og þar með hafa þau lýst sig vanhæf.

Í 14. gr. laga Starfsmannafélags Reykjavíkurborgar segir hvernig lagabreytingar fari fram:

"14. gr.Fundum skal stjórna eftir samþykktum fundarsköpum félagsins. Við afgreiðslu almennra mála nægir einfaldur meirihluti.Við breytingar á lögum og reglum félagsins, en þær má aðeins gera á aðalfundi, þarf 3/4 greiddra atkvæða fundarmanna til þess að lög-mætar séu.Ef fleiri en einn fá sama atkvæðamagn við kosningu, skal hlutkesti ráða úrslitum. Heimilt er að viðhafa listakosningu, ef þess er óskað. Tillögur fyrir aðalfund, sem eru fjárhagslega bindandi fyrir félagið,skulu hafa borist stjórninni fyrir janúarlok og kynntar á fulltrúaráðsfundi fyrir aðalfund."

Ég man tímana tvenna í félagsmálum.

Aldrei hef ég kynnst vinnubrögðum álíka og formaður félagsins hefur beitt í þessu máli.Honum er kunnugt um bullandi óánægju fjölda félagsmanna vegna lögbrotsins, en það virðist ekki hvarfla að honum að draga ólöglegt athæfi sitt til baka.

Því lengri tími sem líður, verður brot hans auðsærra og á vitorði fleiri.

Ef fram heldur sem horfir kallar hann yfir sig dóm fyrir brot á lögum Starfsmannafélags Reykjavíkurborgar og kemst þar með á spjöld félagsins og BSRB.

Það vel þekki ég til réttlætiskenndar heiðvirðra starfsmanna Strætó bs. að þeir munu aldrei gefa félaginu eftir að traðka á eigin lögum.

Athugasemdir

[Vésteinn Valgarðsson, 5.5.2008 kl. 00:21]

Eh.. ég er nú ekki starfsmaður Strætó ef þú hélst það, en ég er aftur á móti tíður farþegi Strætó. Ég hef samkennd með vagnstjórum eins og öðru vinnandi fólki og fylgist þess vegna með stéttarfélagamálum.

[Jón Rúnar Ipsen, 5.5.2008 kl. 02:43]

Er málið ekki það að þessar stöðugu breytingar á vinnuferlum vagnstjóra eru að rugla menn ??

[Heimir Lárusson Fjeldsted, 5.5.2008 kl. 11:03]

Ég hélt það Vésteinn að þú værir vagnstjóri, svo skynsamlega tókst þú á málum.

Jón, ég held að ákaflega einkennilegar hugmyndir vagnstjóra um að þeir eigi að móta stefnu Strætó og stýra einstökum málaflokkum hafi leitt menn á þær villigötur sem starfsmenn eru á.

Framkvæmdastjórnar er að leggja línururnar og stjórna, en starfsmanna að vinna vinnuna sína.

[Heimir Lárusson Fjeldsted, 5.5.2008 kl. 18:19]

Vésteinn, glöggur lesandi skoðanaskipta okkar í Svíþjóð hefur greint mér frá því hver þú ert.

Það er ekki skrýtið að við skulum vera frændur svo gáfulega fjallar þú um þetta viðkvæma mál!

[Vésteinn Valgarðsson, 6.5.2008 kl. 15:18]

Jamm, við erum frændur í fimmta og sjötta ættlið. Grágás kallar það víst ekki skylt, en Þingeyingnum í mér finnst það eðlilegt, frændi.

Ég veit nú ekki hvað óánægjan er mikil meðal starfsmanna. Ég spyr vagnstjóra stundum hvað þeim finnist, og hingað til hafa svörin verið á þá leið að þeir séu óánægðir með framkvæmdastjórann og ánægðir með trúnaðarmennina sem sögðu af sér en drógu svo uppsögnina til baka. Mér finnst undirskriftirnar 104 líka benda til þess að það sé frekar ríkjandi stuðningur við þá heldur en hitt, þótt aðrir séu kannski mótfallnari þeim. Ég mundi kannski kalla það að þeir væru umdeildir, frekar en bullandi óánægju. En það kemur víst í ljós á næsta aðalfundi StRv hvort stjórn félagsins sveik félagsmenn eða hvort hún lét sig hafa það að brjóta reglurnar til að koma til móts við þá. Enn sem komið er hallast ég að því síðarnefnda.

[Heimir Lárusson Fjeldsted, 6.5.2008 kl. 15:40]

"Vigfús Sigurðsson Fjeldsted

Fæddur 1754

Látinn 8. desember 1804

Bóndi og gullsmiður í Galtardalstungu , Staðarfellssókn, Dal. 1801."

Hann var kvæntur Karitas Magnúsdóttur Ketilssonar sýslumanns í Búðardal á Skarðsströnd.

Ég er þeirrar skoðunar frændi, að öllum beri að fara að lögum, hver sem í hlut á. Formaður stéttarfélags getur ekki verið hafinn yfir lög síns félags. Útilokað.

Hann brýtur á rétti trúnaðarmannanna tveggja sem kosnir voru til vara og það sem meira er, þá eru þeir í ágætu sambandi við yfirmenn fyrirtækisins, sem þau hin eru ekki.

Ég get aldrei fallist á að lög séu til viðmiðunar, eftir skapferli manna hverju sinni.

Nú eru allar líkur á að sökum þvermóðsku formannsinns verði ekki samið aftur við StRv þegar kjarasamningur renna út í haust. Er þá ekki verr af stað farið en heima setið?

Þá eru líkur á að fækkun verði í starfsliði Strætó bs. á haustmánuðum. Á meðan sitja Mosdælskir stéttarfélagsforkólfar með hendur í skauti, því þeir kunna ekki þá list að brjóta odd af oflæti sínu.

"Með lögum skal land byggja og ólögum eyða."

[Vésteinn Valgarðsson, 6.5.2008 kl. 19:29]

Ég er sammála því í prinsippinu, frændi. En ef menn álíta að allt sé í hnút, og eina lausnin sé að brjóta lög félagsins og leggja þá embættisfærslu svo í dóm félagsmanna seinna meir, þá taka þeir bara sénsinn. Það er varla hægt að tala um það sem duttlunga fárra manna, þegar 104 vagnstjórar undirrita áskorunina, er það? Einhverjir mundu nú segja að Garðari hefði ekki verið stætt á að hengja sig í formsatriði þegar vilji félagsmanna var skýr, þá hafi verið réttara að brjóta lögin. Nauðsyn brýtur lög, ekki satt?

Ég sé ekki hvernig framkvæmdastjóra getur verið stætt á því að neita að ræða við stéttarfélagið. Ekki aka vagnarnir bílstjóralausir. Mér skilst reyndar að hann sé almennt ekkert mikið í þeim pakkanum að blanda geði við starfsfólk. Kannski að þetta væri bara eftir því? Og með "ágætt samband" gömlu trúnaðarmannanna við framkvæmdastjórann -- ég hef heyrt að samband a.m.k. eins þeirra við hann hafi nú verið einum of ágætt, ef svo má segja.

[Heimir Lárusson Fjeldsted, 6.5.2008 kl. 20:17]

Nú ert þú að leggja trúnað á sögusagnir frændi með því að trúa því að samband eins "hinna gömlu" hafi verið "einum of ágætt".

Þau sem kalla sig trúnaðarmenn ennþá hafa farið með brigslyrðum og svigurmælum í blöðum á hendur framkvæmdastjóranum og eiginkonu hans.

Finnst mörgum það ekki grundvöllur vinsamlegra samskipta. Það nær enginn neinu fram með hnefann á lofti.

Mannleg samskipti byggjast á gagnkvæmri virðingu og skilningi á þörfum hvors annars, virðingu fyrir skoðunum sem þarf ekki að þýða að vera sammála.

Sá sem veifar lögreglukæru í annarri hendinni og óskalista í hinni getur ekki vænst þess að fá óskir sínar uppfylltar.

Á meðan þessi málaferli og kærumál ganga yfir, líður tíminn, samningar renna út, fleiri leiðir verða boðnar út (mannskap fækkar) og líkur á uppsögnum aukast.

Er þetta rétt verkalýðsbarátta frændi?

[Vésteinn Valgarðsson, 8.5.2008 kl. 12:58]

Ekki er þetta sá farvegur sem ég mundi kjósa starfi mínu sem trúnaðarmaður, frændi. Ekki get ég dæmt hvað er rétt og hvað rangt í þessu máli. Kannski að störf nýju trúnaðarmannanna hafi verið vanhugsuð að einhverju leyti, en eftir því sem ég hef heyrt er aðallega við framkvæmdastjórann að sakast. Sögusagnir eru það kannski, en hníga allar í sömu áttina enn sem komið er.

[Heimir Lárusson Fjeldsted, 8.5.2008 kl. 13:30]

Það sem skiptir máli í þessu frændi er að hremmingum þarf að linna. Starfsmenn eiga skilið að til starfa taki trúnaðarmenn sem eru löglegir svo samband við framkvæmdastjórann komist á.

Hann hefur tamið sér annan stjórnunarstíl en forveri hans vegna þess að honum var uppálagt að koma skikk á starfsmannamálin og hann var varaður við vinnubrögðum trúnaðarmanna sem voru leynt og ljóst að reyna að koma fyrri SVR tímum aftur á. Fyrrverandi fyrsti trúnaðarmaður fór um með í ósannsögli og rógburði um sína nánustu samstarfsmenn og fyrrverandi framkvæmdastjóra og sá sem telur sig vera fyrsta trúnaðarmann núna hefur gerst ákafur sporgöngumaður hans.

Á meðan ríkjandi ástand er, getum við ekki annað gert en vorkenna starfsmönnum, því svokallaður fyrsti trúnaðarmaður heyr einkastríð sitt við framkvæmdastjórann vegna áminningar sem hann fékk eftir fyllerí á Hlemmi og er bakkaður upp af formanni StRv og BSRB.

Sú áminning hefur verið kærð og verður að líkindum tekin fyrir í haust hjá Héraðsdómi Reykjavíkur og hvernig sem málalyktir verða þar mun niðurstöðunni verða áfrýjað til Hæstaréttar og málslok verða kannski eftir rúmt ár þar á bæ.

Á meðan hafa kjarasamningar runnið sitt skeið (31.okt.08) og eins og málin standa í dag er óvíst hvort Strætó bs. geti sóma síns vegna samið aftur við Starfsmannafélag Reykjavíkurborgar sem þeim ber engin skylda til.

Sem skynsamur maður frændi, trúi ég því ekki að þú ljáir máls á slíkri ósvinnu.

Málið í hnotskurn:

Strætó samþykkir ekki trúnaðarmennina sem voru búnir að segja af sér og kosning hefur ekki farið fram.

Starfhæfir varatrúnaðarmenn eru hunsaðir af StRv. þvert á lög félagsins.

Svokallaður fyrsti trúnaðarmaður er í einkastríði.

200 starfsmenn líða fyrir vitleysuna.