Gef líkamsræktarstöðvum langt nef, hafandi Þingholtin og Túngötuna.

Veðrið hefur verið með fádæmum gott að undanförnu. Kalt, bjart og stillt. 

Daglegar gönguferðir mínar hafa flestar endað við kirkju Hallgríms Péturssonar á Skólavörðuholti, ýmist eftir Njarðargötu- eða Skólavörðustígsklifur.

 

Ég vona svo sannarlega að kaupmenn lifi endurnýjun iðra Skólavörðustígsins af, en útséð er samt um það,  að Verslun Andrésar verður lokað í vikunni.

Ég brá mér þar inn um daginn og fékk þessar sorgarfréttir, en margir hafa á 40 ára ferli verslunarinnar á þessum stað gert góð kaup á vönduðum fatnaði.

Hún sagði mér reyndar afgreiðslukonan að ekki vantaði nema eitt ár upp á 100 ára afmæli búðarinnar en allt kemur fyrir ekki, henni verður lokað.

 

Tæknihornið fyrir neðan Hvítabandið hlýtur að lifa þetta af því þar fara bestu tölvuviðgerðarmenn í heimi fimlegum höndum og fráum augum um bilaðar tölvur.

(Skyldu þeir vera búnir að sækja dagbókina mína á Makka plúsinn sem er hjá þeim?)

 

Þórir kaupmaður í Vísi sagði mér að Laugavegur 1 sé til sölu, bæði fram- og bakhús.

Það hlýtur hverjum fjárfesti að vera kappsmál að klófesta þau hús og njóta arðsins.

 

Þegar maður hefur Þingholtin að ganga um og Túngötuna á leiðinni heim er hægt að gefa öllum líkamsræktarstöðvum langt nef, svo framarlega sem veður er sæmilegt og vorið komi á þriðjudaginn eins og Mogginn segir og staðfest er af Árna Sigurðssyni veðurfræðingi.

Vorið kemur á þriðjudag