Sigurður G., Magnús Skúlason og Strætó.

 

Þeir fóru vítt og breitt Sigurður G. Tómasson og Magnús Skúlason í þætti Sigurðar á Útvarpi Sögu í gær.

Fullyrðingar og sleggjudómar um menn og málefni féllu á báða bóga og fáu eirt.

 

Mér og fleiri þótti dómur þeirra um leiðakerfi Strætó og þjónustu ærið undarlegur, ekki síst þegar Magnús upplýsti að hann vissi ekki hvernig ætti að borga sig inn í strætó.

 

Þá sagði hann frá öllum vögnunum sem hann mætti tómum á Skothúsveginum. Auðvitað veit hann ekki að þá hafa tugir farþega stigið af vögnunum við Landspítala og Háskóla Íslands svo bara tvö  dæmi séu nefnd.

 

Sigurður G. sem fullyrti líka  mikið um óhæfi almenningssamgangna viðurkenndi samt að hann hefði ekki komið upp í strætó svo árum skipti.

 

Nú langar mig að skora á þá að taka strætó þó ekki væri nema einn dag; Sigurður úr Mosfellsbæ, en þaðan ganga vagnarnir á 15 mínútna fresti um Suðurlandsbraut að Hlemmi á tímanum frá kl. 7 til 10 og 13 til 19, annars á hálftíma fresti.

 

Frá Sveinseyri eru 527 metrar að næstu biðstöð og ráðlegg ég Sigurði að hjóla þann spöl ef honum líst ekki á að ganga og taka svo hjólið með.

Annars getur hann keypt sér leiðabók á 100 kall eða farið inn á heimasíðu Strætó og slegið inn t.d. Sveinseyri sem brottfararstað og síðan áfangastað sínum hverju sinni.

Fargjaldið er 280 krónur, en mun ódýrara er að kaupa kort.

 

Að athuguðu má held ég að best sé að Magnús haldi bara áfram að ganga Skothúsveginn.