RÁÐIÐ.

22.3.2008 | 02:19

RÁÐIÐ

Ef ætlarðu að svívirða saklausan mann,

Þá segðu aldrei ákveðnar skammir um hann,

En láttu það svona í veðrinu vaka

Þú vitir, að hann hafi unnið til saka.

En biðji þig einhver að sanna þá sök,

Þá segðu, að til séu nægileg rök,

En náungans bresti þú helzt viljir hylja,

Það hljóti hver sannkristinn maður að skilja.

Og gakktu nú svona frá manni til manns,

unz mannorð er drepið og virðingin hans.

Og hann er í lyginnar helgreipar seldur

og hrakinn og vinlaus í ógæfu felldur.

En þegar svo allir hann elta og smá,

með ánægju getur þú dregið þig frá,

og láttu þá helzt eins og verja hann viljir,

þótt vitir hans bresti og sökina skiljir.

Og segðu: ,,Hann brotlegur sannlega er,

en syndugir aumingja menn erum vér,

því umburðarlyndið við seka oss sæmir.

En sekt þessa vesalings faðirinn dæmir.”

Svo leggðu með andakt að hjartanu hönd.

Með hangandi munnvikum varpaðu önd,

og skotraðu augum að upphimins ranni,

sem æskir þú vægðar þeim brotlega manni.

Já, hafir þú öll þessi happsælu ráð,

ég held þínum vilja, þú fáir þá náð

og maðurinn sýkn verði meiddur og smáður.

En máske, að þú hafir kunnað þau áður.

Páll J. Árdal.

Flokkur: Dægurmál | Breytt s.d. kl. 02:02 | Facebook

Athugasemdir

Takk fyrir að birta þetta frábæra kvæði eftir Pál J. Árdal

Mér finnst eins og ég hafi séð þig vitna í það áður? En þó svo væri þá sannast hið fornkveðna að "góð vísa verður ekki of oft kveðin"

Ég þykist líka átta mig á tilefninu, sem hefur verið hér til umræðu m.a. á blogginu. Amma mín kenndi mér að það besta sem maður gerði við kýli væri að stinga á þau og sótthreinsa sárið. Þannig tapa illmálgir vindi í seglin sem þeim er nauðsynlegur til að koma sínu fram.

Gleðilega páska!

Sigurður Þórðarson, 22.3.2008 kl. 08:08