Grímur Thomsen.

Sá er nú meir en trúr og tryggur

með trýnið svart og augun blá,

fram á sínar lappir liggur

líki bóndans hjá.

Hvorki vott né þurrt hann þiggur,

þungt er í skapi, vot er brá,

en fram á sínar lappir liggur

líki bóndans hjá.

Ef nokkur líkið snertir, styggur

stinna sýnir hann jaxla þá,

og fram á sínar lappir liggur

líki bóndans hjá.

Til dauðans er hann dapur og hryggur,

dregst ei burt frá köldum ná,

og hungurmorða loks hann liggur

líki bóndans hjá.

 

 

Grímur Thomsen

1820-1896

Páll Valsson segir í Íslenskri bókmenntasögu frá árinu 1996: ,,Í kvæðunum víkur hann (Grímur) stundum að því að hann taki dýrin fram yfir mennina og eru lýsingar hans á málleysingjum oft ákaflega fallegar og beinlínis hjartnæmar....? Íslensk Bókmenntasaga III bls. 357