Á að leyfa fyllerí á Hlemmi?

10.3.2008 | 16:48

Á að leyfa fyllerí á Hlemmi?

Fagna ber framtaki Orkuveitu Reykjavíkur að setja á framkvæmdaáætlun að hita upp skýlin á helstu biðstöðvum borgarinnar og því eina á Akranesi eins og nýlega kom fram í fréttum.

Ekki er að efa að farþegar munu taka þessar viðleitni vel og ganga jafnvel betur um skýlin fyrir bragðið.

Fróðlegt væri að frétta af framtíðaráformum Strætó bs. svo sem varðandi vagnakost, hvort auka eigi einkarekstur á kostnað reksturs sveitarfélaganna (Reykjavíkurstrætó), uppbyggingu vagnaflotans, hvort vagnaverkstæðið og þvottastöð verða boðin út o.fl.

Væri gaman að heyra hvort starfandi sé einskonar framtíðarnefnd hjá fyrirtækinu sem gerði áætlanir um þessi mál og mál þeim tengd.

Undirritaður þykist viss um að á vegum Starfsmannafélags SVR sé ekki verið að fjalla um ámóta málefni og varla er verið að gera það á vegum kjörinna trúnaðarmanna.

Það er tímanna tákn að frammámenn trúnaðarmanna berjast einna helst fyrir því þessa mánuðina að fá að drekka áfengi á vinnustað.

Það er kunnara en frá þurfi að segja að fyrsti trúnaðarmaður er í málaferlum til að fá hrundið áminningu vegna drykkjuskapar hans á Hlemmi.

Má heita víst að drykkjumenn sem hefur verið úthýst af Hlemmi munu fylgjast spenntir með málalokum og krefjast þess að jafnt skuli yfir alla ganga fari dómurinn á þann veg að fyrsta trúnaðarmanni hafi verið heimilt að lögum, að vera fullur þar og vera með áfengi um hönd.

Þess skal getið að aðrir sem komu að málinu hafa lokið því með sátt og afsökunarbeiðni við framkvæmdastjóra Strætó.

Málið er það brýnt að mati Starfsmannafélags Reykjavíkurborgar að almenn drykkja hefjist aftur á Hlemmi að það hefur lagt til lögmann til að sækja þennan meinta rétt.

Væri ekki nær að hyggja að framtíð vinnustaðarins og hvernig hafa mætti jákvæð áhrif á þróun hans, starfsmannanna vegna, en að fá breytt húsreglum á Hlemmi?

Flokkur: Dægurmál | Facebook