Ófriði hjá Strætó verður að linna.

Hjá Strætó ríkir mjög alvarlegt ástand um þessar mundir meðal starfsmanna og hafa menn á orði að þótt oft hafi logað ófriðarbál,  keyri um þverbak nú.
Einn maður sem telur sig tala munni  samstarfsmanna sinna hefur farið hamförum í einkastríði sínu við framkvæmdastjórn fyrirtækisins í viðtölum í dagblöðum og bréfaskrifum til stjórnmálamanna, fyrir utan að hann og hans nánustu samstarfsmenn gera fólki lífið óbærilegt í hvíldartímum,  á kaffistofum og víðar.

Þessi maður var kosinn trúnaðarmaður á liðnum haustmánuðum og losaði sig við ábyrgðina með afsögn við fyrsta mótlæti; má segja daginn eftir að stéttarfélagið hélt nýjum trúnaðarmönum hóf til að fagna kjöri þeirra.

Hann hefur nú verið endurreistur og endurræstur af Starfsmannafélagi Reykjavíkurborgar til frekari herferðar á hendur fyrirtækinu sem hann vinnur hjá.

Þessi maður ásamt með stéttarfélaginu ætti þessa dagana að vera einbeittur í að undirbúa nýjan kjarasamning, en núverandi kjarasamningur rennur út í haust.

Það lýsir kannski ástandinu best að fjórir af fimm sem hafa hringt í mig í gær og í dag segja:"þessi maður verður að hætta".

Starfsmannafélag Reykjavíkurborgar með fulltingi formanns BSRB hefur með þessari aðgerð sagt Strætó bs. stríð á hendur með ófyrirsjáanlegum afleiðingum fyrir um 200 starfsmenn fyrirtækisins.

Mikið hvílir á herðum þeirra sem ábyrgðina bera.

Fjölmargir starfsmenn hafa komið að máli við undirritaðan og lýst áhyggjum sínum af þróun mála og eiga þeir það eitt sameiginlegt; að vilja frið um vinnustaðinn sinn.
Ófriðurinn hefur eitrað líf þeirra  og fjölskyldna þeirra nóg.