Mjaðmakúlur, krabbamein og depurð.

Geðraskanir hafa raskað ró almennings að undanförnu. Það er hreint með ólíkindum hversu margir geta sagt af reynslu sinni af þeim vágesti, en flestir þegja.

 

Hér á Rauða Kross hótelinu við Rauðarárstíg eru stundum fjörlegar umræður um sjúkdóma, aðallega þá er herja á líkama okkar, en andlegu sjúkdómarnir fá minni umfjöllun. Það er eins og ríki þegjandi samkomulag um að vera ekkert að opna þá umræðu, en láta nægja að dæsa og segja:" ótrúlegir fordómar"

 

Hér er rætt um mjaðmakúlur, fasta hryggjarliði, holskurði, krabbamein, stera, penicillín og lyfjahrúgur allskonar örvandi og deyfandi og allir hafa sitt til málanna að leggja.

 

Að vísu er svona umræða ekki mér til skemmtunar, en til að vera samkvæmishæfur tekur maður þátt.

 

Ég hef ekki heyrt neinn vera með fordóma gagnvart mjaðmakúlum eða krabbameini.

Ekki ennþá

Athugasemdir

[Heimir Lárusson Fjeldsted, 29.1.2008 kl. 12:01]

Gott innlegg í umræðuna!