Harmleikur batt endi á líf ungra manna og lögreglan neitar að upplýsa málavöxtu.

Guðrún Sverrisdóttir hjúkrunarfræðingur skrifar mjög góða grein í Morgunblaðið í dag um örlög frændsystkina sinna  sem ung voru vistuð á Kumbaravogi. Flest hefur reyndar komið fram áður í greinum í DV þar sem blaðamaður hefur frásagnir eftir Ragnari Agnarssyni eldri bróður þeirra Einars Þór heitins og Ernu Agnarsbarna.

Kristján fyrrum forstöðumaður Kumbaravogs verður beinlínis að gera grein fyrir gjörðum sínum. 

Það sem enn er ófrágengið í þessu máli er hvernig dauða Einars Þórs bar að er hann fannst látinn í Daníelsslipp 1985 ásamt félaga sínum.

Þeir voru sagðir hafa tekið eigið líf. 

Er það sannleikanum samkvæmt? Ég held ekki. Skýrslur um málið eru faldar og lokaðar í hirslum undir því yfirskini að um trúnaðarmál sé að ræða og því fá systkini hins látna Einars Þórs ekki aðgang að þeim.

Ragnar Agnarsson  afskaplega vandaður maður til orðs og æðis hefur bent á að  þegar komið var að líkunum sat Einar Þór í framsæti bifreiðarinnar og slangan sem leiddi baneitraðan og sjóðandi heitan útblásturinn var þétt við kinn hans og var allt hold af........

Hefði maður sem lagði slöngu frá púströri bifreiðar inn um glugga og sýndi með því töluvert lífsmark, getað setið kyrr með vangann þétt að slöngunni meðan holdið sauð af honum?

Var hann ekki kaldur nár þegar slangan var sett inn um gluggann?

Hvenær ætlar dómsmálaráðherra að láta undan þrábeiðni aðstanenda Einars Þórs Agnarssonar og svipta hulunni af lögregluskýrslum?

Ég held að það verði fljótlega, en þá mega líka stöku lögreglumenn biðja Guð að hjálpa sér.