Sumar- og afmælishátíð Kjötborgar.

Nú er komið að því, að afmælishátiðin verður haldin á morgun 16. september og hefst klukkan 13:00. Dagskráin hefst við elliheimilið Grund með skrúðgöngu um hverfið við undirleik lúðrasveitar. Að skrúðgöngunni lokinni verður boðið upp á veitingar, hoppukastala, spámiðilinn Sjáanda og margvísleg skemmtiatriði önnur á útisviði. Hinn góðkunni æskulýðsfulltrúi Grundar, sr. Pétur Þorsteinsson verður kynnir og mun fara á kostum ef að líkum lætur. Ein aðal stoð og stytta Kjötborgarbræðra Halldór Eldjárn hefur verið þeim innanhandar við allt skipulag og kynningu og verður vert að klappa þeim dreng lof í lófa ásamt þeim bræðrum. Ég sem viðskiptavinur og aðdáandi gerði hlé á sumarleyfisferð minni til að geta tekið þátt í hátíðarhöldunum fyrir leikinn á Meistaravöllum þegar heimamenn taka á móti Grindvíkingum í næst síðasta leik Landsbankadeildarinnar. Leikurinn hefst klukkan fjögur og ekki að efa að fólk flykkist á völlinn eftir góðar veitingar Kjötborgarbræðra, til að hvetja sína menn því oft hefur verið þörf á hvatningu en nú er nauðsyn. Vert er að geta þess að á sama tíma eiga Víkingar í hatrammri baráttu við Fimleikafélagið í Hafnarfirði við að halda sæti sínu í Landsbankadeildinni og hvet ég alla sem ekki fara á KR-völlinn að styðja Víkinga í Krikanum.